Ferlið

Fyrir segulómun þarf að fjarlægja fatnað og fara í slopp sem þú færð á staðnum, taka alla skartgripi og lausa málmhluti. Augnfarða þarf einnig að fjarlægja þar sem hann inniheldur málmagnir. Gott er að hafa þetta í huga og mæta í rannsóknina án förðunar og í þægilegum fötum sem ekki hafa rennilás, smellur o.fl sem gæti truflað myndgæði. 

Þú geymir fötin og hlutina þína í læstum skáp á meðan þú ert í rannsókninni. Þegar þú kemur á rannsóknarstofuna leiðbeinir geislafræðingur þér og kemur þér fyrir á rannsóknarbekknum sem er í lokuðu herbergi. Þar til gert loftnet er látið umlykja þann líkamshluta sem á að rannsaka og teppi breitt yfir þig. 

Þú færð eyrnatappa eða heyrnartól fyrir útvarp og neyðarbjöllu í hendina og síðan hefst rannsóknin. Hún tekur 15-60 mínútur og á meðan á henni stendur getur þú alltaf náð sambandi við geislafræðinginn sem fylgist með þér í gegnum glugga á rannsóknarherberginu.

Tækið gefur frá sér mikinn hávaða á meðan á rannsókn stendur, síendurtekin bankhljóð sem eru fyllilega eðlileg og ekkert sem þarf að óttast. 

Hverjir mega ekki fara í segulómun?

Því miður mega ekki allir fara í segulómun og ef þú ert með eitthvað af eftirtöldu þarf að athuga sérstaklega hvort óhætt sé að segulóma: 

  • insúlín- eða verkjalyfjadæla
  • ígrædd heyrnartæki
  • kuðungaígræðsla í eyra eða gervi ístað
  • ígræddar taugaörvunarleiðslur
  • hjartalokur af eldri gerð
  • aðskotahlut úr málmi nærri augum

Hjartagangráðar og segulómun

Flestir gangráðar sem settir eru inn í dag mega fara í segulómskoðun/MR. Áður en rannsókn fer fram þarf að núllstilla gangráðinn hjá gangráðsmóttökunni. Við sjáum um að bóka tíma í stillingu fyrir rannsókn og einnig í endurstillingu að rannsókn lokinni. 

Einhverjar eldri tegundir gangráða mega ekki fara í segulómun, en þau tilvik eru skoðuð sérstaklega. 

Undirbúningur

Aðeins fáar segulómrannsóknir krefjast sérstaks undirbúnings. Áður en rannsókn hefst þarf að fara yfir nokkrar spurningar um öryggisatriði og mikilvægt að þú mætir tímanlega.

Börn í rannsókn

Segulómunartækið getur virst ógnvekjandi fyrir börn og því er mikilvægt að fræða þau um það hvernig rannsóknin fer fram og leyfa þeim að spyrja spurninga áður en þið komið með barnið í rannsókn. Ef barnið er óvant að nota heyrnarhlífar er gott að þjálfa það í því svo það komi því ekki á óvart þegar rannsókn hefst. 

 

Foreldrar eru alla jafna ekki með börnum í rannsóknarherberginu en ef það reynist nauðsynlegt þurfa foreldrar að svara öryggisspurningum og undirbúa sig á sama hátt og barnið. 

 

Athugið að miklivægt er að mæta með tilvísun í rannsókn frá heimilislækni og framvísa henni þegar mætt er.

Tímapantanir og niðurstöður

Ef læknir er búinn að senda beiðni fyrir rannsókn sem þarf undirbúning hringjum við í þig  og finnum tíma við fyrsta hentugleika. 

 

Þegar rannsókn er lokið fær læknirinn sem vísaði þér til okkar niðurstöðurnar og hefur samband við þig og kynnir þær fyrir þér. Algengur biðtími er 1-2 dagar.