Röntgenrannsóknir: Ristill

Undirbúningur:

• 24 klst. úthreinsun. Sjá nánari leiðbeiningar um úthreinsun.
  
• Fólk þarf að fara úr öllu og fær slopp til að vera í meðan á rannsókn stendur.

Frábendingar:
Þungun.

Úthreinsun:
Mikilvægt er að fylgja leiðbeiningum um úthreinsun í hvívetna. Einungis skal nota þau efni sem Röntgen Domus ákveður hverju sinni og taka þau á tímanum sem gefinn er upp nema læknirinn hafi tekið annað fram.

Með því að fylgja leiðbeiningunum næst bestur árangur og komið er í veg fyrir að endurtaka þurfi meðferðina.

ATH! Að svörun einstaklinga við hægðalosandi efnum er mismunandi og ráðlegt er að halda sig í nánd við salerni eftir að úthreinsunin er hafin.

ATH! Það er nauðsynlegt að drekka mikinn vökva. Drekktu a.m.k. eitt glas af vatni (250 ml.) á þeim tímum sem gefnir eru upp. Ekki má drekka mjólk, rjóma eða gervirjóma.

24 klst úthreinsun: Dagur fyrir rannsókn (merktu við það sem er búið jafnóðum)
Morgun: Glært kjötseyði, ávaxtasafar án aldinkjöts, gosdrykkir, svart kaffi eða mjólkurlaust te.
Hádegi: Glært kjötseyði, ávaxtasafar án aldinkjöts, gosdrykkir, svart kaffi eða mjólkurlaust te.

• Kl. 13:00 Eitt fullt glas af vatni (250 ml.)
  
• Kl. 14:00 Eitt fullt glas af vatni (250 ml.)
  
• Kl. 15:00 Eitt fullt glas af vatni (250 ml.)
  
• Kl. 16:00 Eitt fullt glas af vatni (250 ml.)
  
  
• Kl. 17:00 Glært kjötseyði, ávaxtasafar án aldinkjöts, gosdrykkir, svart kaffi eða mjólkurlaust te.
  
  
• Kl. 17:30 Taktu ílát sem tekur a.m.k. 500 ml. af vökva. Helltu fyrst 250 ml. af köldu vatni íílátið og hrærðu svo varlega innihaldi pokans með ”Magnesium carbonate”, ”Citric Acid” og ”Potassium Citrate” í vatnið. Hrærðu varlega eftir að það hættir að freyða og drekktu alla blönduna. Þetta veldur yfirleitt hægðum eftir ½ til 6 klst.
  
  
• Kl. 18:00 Eitt fullt glas af vatni (250 ml.)
  
• Kl. 19:00 Eitt fullt glas af vatni (250 ml.)
  
  
• Kl. 19:30 Rífðu upp bakhlið töflupakkans og taktu töflurnar 4 úr. Taktu þær allar með einu fulluglasi af vatni (250 ml.). Ekki má tyggja töflurnar! Þær á að taka tveimur klukkustundum eftir að ”Magnesium carbonate” ”Citric Acid” og ”Potassium Citrate” blandan hefur verið drukkin. Yfirleitt valda töflurnar hægðum eftir 6-12 klst.
  
  
• Kl. 20:00 Eitt fullt glas af vatni (250 ml.)
  
• Kl. 21:00 Eitt fullt glas af vatni (250 ml.)
  

Rannsóknadagur: Hvorki má borða eða drekka!

Taktu meðfylgjandi endaþarmsstíl a.m.k. tveimur klukkustundum áður en þú átt að mæta í rannsókn.

Leggstu á hlið og lyftu lærinu. Ýttu stílnum varlega inn í endaþarminn eins langt og mögulegt er.
Reyndu til hins ýtrasta að halda í þér í a.m.k. 15 mínútur. Þarmatæming verður venjulega eftir 15 – 60 mínútur.

Tími:
Rannsóknin tekur um 30 mínútur.

Framkvæmd:

• Fólk leggst á vinstri hlið og dregur að sér hnén.
  
• Geislafræðingur setur upp staut í endaþarm (stólpípu) og þarf að reyna að halda honum inni meðan á rannsókn stendur.
  
• Röntgenlæknir framkvæmir rannsóknina og lætur renna inn bariumblöndu í gegnum stólpípuna.
  
• Um leið þarf fólk að velta sér í hringi á rannsóknabekknum og þannig myndar bariumblandan þekju innaná ristilveggnum og gerir mögulegt að skoða hann með röntgengeislum.
  
• Þegar komin er góð þekja innaná ristilinn er allt sem er umfram af bariumblöndunni látið renna sömuleið til baka gegnum slönguna og lofti dælt inní ristilinn.
• Í stöku tilfellum fær fólk lyf (Buscopan) til að slaka á ristlinum áður en loftinu er dælt inn.

Innstilling:
Fólk liggur á rannsóknabekk og þarf að velta sér fram og til baka ýmist á bakið, magann eða uppá hliðarnar meðan á myndatöku stendur.

Myndataka:
Notast er við röntgengeislun og ristillinn er skoðaður í gegnumlýsingu meðan á rannsókn stendur. Teknar eru margar myndir bæði í liggjandi og standandi stöðu.

Aðrar upplýsingar:
Hafi fólk gláku ætti það að láta vita áður en rannsókn hefst.

Viðbrögð við bariumskuggaefni eru óþekkt en mikilvægt er að drekka vel af vökva til að koma í veg fyrir hægðatregðu.

Fólki er óhætt að borða eins og það sjálft treystir sér til að rannsókn lokinni.

Fólki er óhætt að aka að rannsókn lokinni.

Blývörn er áföst við tækið og ver þannig viðkvæm svæði s.s. kynkirtla bæði karla og kvenna. Geislavarnir felast í nákvæmum og réttum vinnubrögðum geislafræðingsins og röntgenlæknisins s.s. lágmarks stærð á geislafelti, stöðu fólks meðan myndað er og réttu vali á tökugildum.

Forðast skal að mynda barnshafandi konur nema brýna nauðsyn beri til. Velja skal hættuminni rannsókn ef kostur er á slíku.