Röntgenrannsóknir: Þvagfæri

Undirbúningur:

• Drekka vel daginn fyrir rannsókn.
  
• Fólk þarf að afklæðast öllu nema nærbuxum og fær slopp eða bol til að vera í meðan á rannsókn stendur.
• Þeir sem taka sykursýkislyfið Glucophage þurfa að hætta því í 48 klst. í kjölfar skuggaefnisinndælingar.

Frábendingar:
Þungun og ofnæmi fyrir skuggaefni.

Tími:
Rannsóknin tekur um 1 klst.

Til athugunar:
Mikilvægt er að þvagblaðran sé tóm þegar rannsókn hefst.

Framkvæmd:

• Fólk pissar. Teknar eru yfirlitsmyndir af nýrum, þvagleiðurum og þvagblöðru.
  
• Skuggaefni er sprautað í bláæð í handlegg og skilst það út í gegnum nýrun.
  
• Myndir eru teknar af nýrunum á meðan efnið er að skiljast út.
  
• Í lokin getur þurft að láta fólk tæma þvagblöðruna aftur og taka svo mynd af henni tómri.

Innstilling:
Legið er á bakinu stóran hluta rannsóknarinnar og þarf fólk ekki að hreyfa sig mikið. Þó eru teknar skámyndir af nýrunum og þá þarf fólk að velta sér hálfa leið upp á hvora hlið. Undir lok rannsóknar þarf að taka eina mynd þar sem fólk liggur á maganum.

Myndataka:
Teknar eru 11 myndir en stundum geta þær orðið fleiri.

Aðrar upplýsingar:
Karlmenn geta hér fengið svokallað pungblý eða eins konar buddu sem sett er utanum punginn til að verja hann fyrir geislun. Erfiðara er að verja eggjastokka kvenna enda staðsetning þeirra ekki eins nákvæm og kynfæri karla. Geislavarnir felast í nákvæmum og réttum vinnubrögðum geislafræðingsins s.s. lágmarks stærð á geislafelti, stöðu fólks meðan myndað er og réttu vali á tökugildum. Gott er að verja brjóst kvenna með blýsvuntu þegar við á.

Forðast skyldi að mynda barnshafandi konur nema brýna nauðsyn beri til. Velja skal hættuminni rannsókn ef kostur er á slíku.

Þessi rannsókn er líka kölluð IVP, IVU eða Urografía.