Röntgenrannsóknir: Magi

Undirbúningur:
Fasta frá miðnætti.
Með föstu er átt við mat, drykki, tyggjó og reykingar.
Fólk þarf að fara alveg úr að ofan og fær slopp eða bol til að vera í meðan á rannsókn stendur.

Frábendingar:
Þungun.

Tími:
Rannsóknin tekur um 30 mínútur.

Myndataka:
Teknar eru allmargar myndir. Notast er við röntgengeisla og maginn skoðaður í gegnumlýsingu.

Fólk situr upprétt og gleypir duft sem myndar loft í maganum. Eftir það er mikilvægt að passa vel að ropa ekki.

Í framhaldinu er fólk látið drekka bariumblöndu sem mynda á þekju innan á maganum svo hægt sé að sjá hann á röntgenmynd.

Fólk ýmist stendur eða liggur útaf meðan á rannsókn stendur og þarf að snúa sér eftir beiðni læknis. Fólk liggur/stendur því ýmist á baki, maga eða hlið allt eftir þörfum.

Aðrar upplýsingar:
Blývörn er áföst við tækið og ver þannig viðkvæm svæði s.s. kynkirtla bæði karla og kvenna. Geislavarnir felast í nákvæmum og réttum vinnubrögðum geislafræðingsins og röntgenlæknisins s.s. lágmarks stærð á geislafelti, stöðu fólks meðan myndað er og réttu vali á tökugildum.

Forðast skal að mynda barnshafandi konur nema brýna nauðsyn beri til. Velja skal hættuminni rannsókn ef kostur er á slíku.

Viðbrögð við bariumskuggaefni eru óþekkt en að rannsókn lokinni er mikilvægt að drekka vel af vökva til að koma í veg fyrir hægðatregðu.